iets verhelder
iets word gestroop
iets word stadiger
iets word ritmies
iets haal asem
iets fokus
iets kry betekenis
hoe kan ek huiwer met
'n potlood in die hand?
soveel goeie effekte wanneer ek skryf
skryf maak my asem
skryf maak my binne-oog oper
skryf maak sin
skryf verdryf die stemme wat my nie dien nie
skryf is die goue draad
wat ek opgetel het toe ek as kleintjie
my eerste letter op papier gevorm het
en tot vandag toe nog in my hande dra
met elke woord wat ek borduur op papier
skryf is blompotte en tuin natmaak
skryf is 'n warm watersak
skryf is 'n sussende wiegie
skryf is soos piepie - verligting
na 'n lang knyp
skryf integreer
skryf is delf
skryf is vastrap
skryf is oes
skryf is sif
skryf is hardop droom in ink
skryf is wakkerword en opstaan
skryf is aanpassing en teenstand
skryf is onhutsend en hygge
skryf is die lekkerste ding om te doen
in my bed voor ek aan die slaap raak
skryf is luister
skryf is vormgee
skryf is vertering
vertedering
beredenering
skryf is 'n brug na die ander kant
skryf is uitstraling
skryf is lewe
No comments:
Post a Comment