Gode van die Vurige Vrees

photographer David Cushing

photographer Gilles Chevalier

A very striking and memorable art installation at this year's AfrikaBurn Festival, The Fear Gods by artists Kim Goodwin & Elisabeth Balcomb inspired me to write this Afrikaans poem>

gode van die vurige vrees

die gode loop angstig al om my enkels

wag vir net die regte tyd om hulle tande in te sink

soos wilde oerdiere wag hulle met die aarde se tyd

lank groei hulle ledemate met hierdie wag

en nog langer groei hulle lus met elke nag

die gode loop onverskrokke oor die aarde

kyk nie links of regs

loop ongedeerd deur die lug en oor die klippe

hulle rugstringe buig met die wind

hulle knieë knak met die stof-blitse

hulle oë styg en sak met die son

nooit sal jy hulle uit die oog kan verloor

soos vrees sit hulle om jou keel

herinner jou aan die rigting waarheen jy moet trap

soontoe, soontoe

van daardie middag toe die gode oor my pad stap

was niks anders dieselfde daarna

met skouers, arms, borste, boude en bene

het die landskap gegil van

dierlikheid

'n wilde dierlikheid

gefokus, stil, onstuitbaar

is hulle voete-pas vasgenael in die grond

met soveel oortuiging is hulle god

is hulle dier

is hulle mens

uit hulle oogholtes broei die donker wolke

kolk die lug in een heilspellende inkarnasie

wat god-weet enige oomblik los kan skeur

maar staan, staan hulle in die oog van die storm

vlug nie, lag nie,

geen histerie

net 'n kreun wat saggies deur die linker bo-been breek

staan, staan hulle

op die vlaktes

die gode van die Vurige Vrees –

julle hou die lug,
die hart 
en die aarde
wakker!

The Burn of the Fear Gods
photographer Ed Franc Loverock Babb