“a ray of
light that was made fruit
the minute
fire of a planet”
-
Pablo Neruda
in hierdie
oomblik is jy die vrugste van vrugte
die klein
ontploffings in my sintuie stormloop my verbeelding
gooi my toe
met duisend goue mandaryne
laat elkeen
van julle soos oranje soene oor my lyf oopvou
die beswyming
gedy wiegend soos soet getye deur my mond
my keel breek
in sugtende kreune
soos wat die
sitrus
mandalas
onder my verhemelte oopsprei
rapsodies
spruit my tong ekstra smaakkliere
om elke grein
aroma in te suig
jubelend
verlig jy selfs die son!
gee my nog
tande, tonge en slukpype
om die
oorvloedige feestelikheid
van jou te
kan proe en indrink
***
in hierdie
tye van newelagtigheid
is dit jy op
my tong wat
my weer in
vrede en gesondheid laat glo
ek sit jou
skil soos ‘n skulp teen my oor
jou sagte wit
binnevel
tril met die
rillings van vermenigvuldiging en oorvloed
met een
mandaryn-skil is ek ‘n clairvoyant
in een oranje
spatsel op my voorarm
skyn ‘n
glimmerende mirage van die toekoms
jou skyfies
soos sappige edelgesteentes
gesprei oor
die kuslyne van ons monde
weeg elke
amberstukkie op die tong
en proe die
rare ryk reënbuie van afrika in die sappige selle
***
barnsteen-klokke
lui deur die groen takke
kom skil die
mandaryne! kom skil die mandaryne!
kyk hoe die
oranje skywe soos klein glimlagte
in die palms
van hande oopbreek
ons staan met
ootmoed en taai wange
en besing
hierdie mandaryn-gawe
wat soos ‘n
goue skemer
die soete
herinnering oor ons kele verf
kom skil die
mandaryne! kom skil die mandaryne!
***
o mandaryn,
jy is suiwer spontane metafoor
wat roekeloos
uit die keelgat lek
en in
eeue-oue sillabes
soos stalaktiete
van die verhemeltes drup
***
mag die hemelliggame vir een aand
vervang word met die mandaryne
dat die heelal soet en helder
in taai-druppel arabesques
deur almal se drome sal skyn
***
move on with the changing times, Opperman!
en laat my eerder sing
o my nooi is
in die ClemenGold mandaryn!
***
die mandaryn-bome is bedrewe marionet-meesters
wat nartjie-poppe-teater speel
en pointillisties die juigende vrugteboorde
met onblusbare oranje inkleur
watter oneindigende skilder-pret sou van gogh en dali kon toor
met hierdie dansende mandaryne
***
‘n stille majesteit:
die buigende takke ril oor die swygende lanings in die boord
die lug sy hang vol verwagting
want sy het al vantevore gesien
hoe die oes-seisoene glimmer met juigende hande
soos die oranje orakels
sagte insigte in die mandjies murmel
maar vir nou hang die lug vol verwagting
die buigende takke ril oor die swygende lanings in die boord:
‘n stille majesteit
***
you are
what you eat
mag ek oornag in ‘n
ClemenGold mandaryn verander!
***
soos bedrewe alchemiste giet son, water en grond
elke klein oranje koeël wat
so raak deur my sintuie skiet
kwes my verruklik diep tot in die hart van my tong
***
kyk die groot ronde oë wat met innige oranje onskuld
die wêreld soos wyse harlekyne beloer
***
ek smile daai mandaryn-smile
want my duim voel die grootste lekkerte
om daai eerste skeur deur die skil te maak
en hoe frons ek daai mandaryn-frons
wanneer daai gekwesde skil my so slinks
in die oog spat
nou ja, wat sê hulle van karma?
***
my kakebeen gee oor aan die oranje ontspanning
my mond is uitgelewer aan hierdie soete omsingeling
my nek ontkoppel
ek tuimel neer in ‘n sitrus beswyming
moenie my in die rede val as ek ‘n ClemenGold besing nie!
***
