Showing posts with label humor. Show all posts
Showing posts with label humor. Show all posts

Thursday, 22 May 2025

Hoendertande

Een van my klavierstudente se mammas het gevra of ek vir hom 'n gedig kan skryf wat hy tydens die skool se Eisteddfod kan voordra. Hier is dit. 
(Ek is so trots om te rapporteer dat Michael goud en baie positiewe kommentaar gekry het vir sy voordrag). 

Hoendertande

Goeie dag Liewe Luisteraars
ek wil julle voorberei:
Wat julle hier gaan sien
is soos hoendertande – baie skaars:
‘n 10-jarige seuntjie van Mossie straat
wat veel meer ‘n tennis toernooi wil speel
staan nou hier om ‘n gedig met julle te deel

Ek het geen net of rakket om my te beskerm
HELP! Ek kry ‘n knoop in my tong en my derm
Waar is my groen balle wanneer ek hulle nodig het?!
Net een enkele klein gedig in my mond
om my van julle starende oë te red!

Ek is darem nou al in die middel van die vers
Ek hoef nie meer op my tande te kners
Ek begin van hierdie rym te hou -
dit is soos om op tjoklits te kou

Al jaag my asem en word my wange rooi
is dit so lekker om woorde oor die net van my tong te gooi
Ek hoor al hoe die skare gaan juig
wanneer ek aan die einde vir almal gaan buig

Nee! Hoe het ek so gou by die einde gekom!?
My maag het nog nie eens begin brom

Liewe Luisteraars – luister nou mooi
Ek het julle gewaarsku wat julle hier gaan sien
is soos hoendertande – baie skaars
Hierdie 10-jarige seuntjie van Mossie straat
wat so graag tennis toernooie speel
wil nou meer en meer gedigte met die wêreld deel

Tuesday, 25 February 2025

komaan Lara 2024 is lankal verby!

is ek nou binne die 5 van 2025?
die 5 voel nog so vreemd onder my potlood

oefen nou Lara:
ek wil en moet meer gemaklik en 
teenwoordig word met hierdie 5
5 5 5 5 5 5 5 5
 5   5   5   5   5   5
5 5   5 5  5555  5555  5 5 555    555 
5

nee! dis 'n ongemaklike gekrappery!
wat 'n onelegante vetpensnommer
moet ek myself maar oorgee aan 
die lompheid van hierdie jaargetal?

ahhh ek het so baie van 2024 gehou as 'n getal en 'n jaar
 - dit kan nie oor en verby wees nie?!

komaan Lara 2024 is lankal verby!
span jou kreatiwiteit vingers en tone in
om hierdie 5 met vollywige selfvertroue en 
feestelikheid in te kleur:
komaan: doen dit more eerste ding:
vat soveel moontlik kleurpotlode en 
griffel en dans 
daai f*kkin 5 vaartbelyn en 
swierig aan die lewe!

Tuesday, 14 January 2025

voor die begin was die soen

jy soen my omdat
ek jou soen
omdat jy my soen
omdat ek jou
soen omdat jy
my soen
omdat
ek jou soen
totdat ons nie weet
wie het die soen begin soen
en aan die begin
was die soen die begin van die begin van die soen
is die begin van die einde
want hoe lank kan die ek
die jy
begin soen
voordat die jy
begin om terug te soen
en dan voor ons ons oë uitvee
is ons op die punte van ons lippe
en die soene val om ons neer
en verdrink in die beginne van al ons soene
want daar is 'n vloed van beginne wat wag 
vir die begin van die soen en 
dis altyd begin van voor af
dis altyd soen van voor die begin
en die begin is so geduldig vir die begin van
die soen maar hoe meer beginne 
hoe meer word die honger
en ons is van vooraf weer honger
want hoekom raak ons honger soos
aan die begin wanneer die begin so honger wag
om weer te begin soen

Wednesday, 6 September 2023

altyd oop vir inter-PRET-asie

ek wil 'n gedig skryf wat op 
'n pareidoliese manier wonderbeelde
in jou kop toor
sodat jy nuwe vorme en figure sien 
opdyns en dans met mekaar 

is dit nie maar wat ons almal
elke dag dag doen nie - ?
dat jy sin maak van my sin
op jou manier
en wanneer jy my vertel van 
jou manier van sien
spieël jou ervaring 
weer terug in my brein
op my manier

dit bly maar 'n wonderwerk
dat ons heel sinvolle gesprekke kan hou
en iewers oor die troebel waters
'n helder brug kan vind om oor te klim

***

is die kunstenaar werklik dan die kunstenaar?
die waarnemer kan verseker meer erkenning kry
vir haar eie kunssinnigheid

om jou eie nuwe skepping raak te sien 
binne 'n bestaande kunswerk
is 'n talent 
is 'n kuns

***

dus en daarom:
bly kyk en skep
bly skep en kyk
die inspirasie werk wedersyds

Tuesday, 22 August 2023

'n klein vlokkie van 'n gedig

ongestoord dig ek voort met die woord wat 
rym met die soort akkoord wat
my neem na die toevlugsoord van behoort
sodat die lewenspoort kan uitswel
soos 'n digte vrugteboord 

dignoord en vlokvoort!

Tuesday, 15 August 2023

laat wiel

ek klim binne my gedig asof 
dit ‘n trollie is
en laat wiel met haar die rymende isles af –
geen groter plesier as poetry-on-wheels nie!

Sunday, 11 June 2023

...en skielik

ek sien ‘n pa
sy klein dogtertjie
stoot in ‘n Woolies trollie
en skielik voel ek die vreugde
van pa-en-kind-wees

ek is nie self ‘n ma nie
maar ek kry die oorweldigende gevoel
om hierdie gedig in ‘n trollie te laai
en haar oor al die paaie te stoot
en haar hoor lag en giggel
en ons altwee borrel van trollie-plesier

Saturday, 18 March 2023

K i m

the explosive K in your name
breaks open in my ears like a blazing kaleidoscope

i hold a little longer onto the crackling kernel of that first plosive
keenly my breath is taken aback by
the knockknockknocking of its percussivity

over the years your K has become so kindred to my throat
what would my soft palate be without it?
i keep kindling it between my tongue and velum

no wonder the word Kiss also begins with this knightly letter!

how kind your kismet has been to carry your essence on the wings
of this fortifying sound!

K!!!
i let the kiln of my throat fire it once more before
it sinks
into
the closure of
the last two dreamy letters

immmmm

Yes! himmmm with the K
whom i love

Monday, 29 August 2022

klitsgras van die kundige letterheid

die kilte van die klitsende wind
karnuffel my sintuie
dis kompleet asof konyn-agterbene 
in my kieste groei
en ek die klitsgras van die kundige letterheid
klutskwyt spring

Friday, 17 June 2022

Scaramouche

my vers voel dikwels soos die flopnek Scaramouche
trots en parmantig wil sy haar kleure en sjarme afwys
maar dan kom Harlekyn en boks haar nek- en neuswerwels los
dat alle drome van digterlike transendering
uit haar oë spat en in die stof tot in die verdrietige nietigheid
w e g s y f e r

Thursday, 2 June 2022

dig voort!

in my woord 
soek ek dikwels 
'n mooi akkoord
daai klinkende soort 
wat in die oor hoort
en omskep word 
in 'n rype vrugteboord 
en onverstoord 
enige gedagte van self-moord
wegwys na die poort 
van die vakansie-oord

bind die woord 
al singend om  
my stem-koord
en dig voort!

Friday, 13 May 2022

die superheros van die digterlike hongersnood

ek hou my pen dop
gevries in tyd staan hy teatraal in sy heroïese postuur
nes die houding van strutting superheros
op hulle reklame plakkate
skielik wapper 'n swart jas om 
die skouers van die pen
groot stewels om sy voete
kyk hy my uit met oë wat 
ver in die gedig se toekoms tuur

die fokus zoom in op die penpunt 
so klein en dun
amper niksseggend in sy skraalheid
dit is uit daai einste punt waaruit
die allesseggende gravitas van 
die poëtika met singende spiere aangehardloop kom
en die verwarde hart van die digter sal red

bly hande vashou met my penne
- die superheros van die digterlike hongersnood!

Monday, 29 November 2021

in plaas van

in plaas van die muse
kom land die somer-vlieë op my papier

Saturday, 27 November 2021

dieselfde ou deuntjie

kan ek kom skuiling soek
in die helder donkerte van die gedig?
ek het geen koplamp, kerse, maan of sterlig nodig
om my weg te sien 

agge nee!! verval sy alweer in die ars poetica-groef?!

is digkuns 
waarlik digkuns
as die digter óór die digkuns dig?
'n diepe wroeging oor hoe en waarom 
die digkuns spruit

wee, o wee, dieselfde ou deuntjie van
die self-reflekterende gedig:
alweer die arse poetica wat
in sy eie hol op kyk
en wonder vanwaar kom
al die kak vandaan?

Saturday, 20 November 2021

soos 'n hond

ek wil soos 'n lieftallige hond
aan almal se voete en bene snuffel
hier en daar opspring en gesigte uitbundig natlek
dan met my vier lawwe pote 
wil ek rats en verspot in 
skietende sirkels rondpyl van ekstase
gras blomme potte tafels katte stoele laat spaander die lug in
en dan salig en tevrede by jou voete neerval

Monday, 18 October 2021

gee my eerder polyfilla

dit is nou een ding wat my irriteer:
wanneer iemand vir my uit die bloute die teksboodskap stuur:
Hi Lara, how are you?
en niks anders
dit is een van die luiste vrae onder die son

ek sal nooit hierdie woorde vir iemand stuur op teks
as ek waarlik belangstel 
sal ek my verbale konneksie meer aanvul

sê iets meer van jou nuuskierigheid of belangstelling in my welstand
of bel my eerder dat ek ten minste jou stem kan hoor!

ek voel gedegradeer om myself te verknoei in die oorweging 
om die vraag te antwoord of nie
ek weet van vandag af sonder twyfel
ek antwoord nie hierdie teksboodskap-vraag nie 

gee my eerder polyfilla
om die stil gate te stop
en nie so 'n vraag  nie!

so nou weet julle:
moenie hierdie onkreatiewe, kort-af vraag vra op teks nie
ek glo dit kom van 'n gevoel van omgee
maar wys my dan dat jy my menswees, insig, my diepheid hoër ag
and give me more!!

Monday, 27 September 2021

Ontmoeting tussen foto en gedig



die seisoene
skil
die dae
kalm
een vir
een
van die rame
van
vensters


diep in
die binnenste ruimte
van die hart
trek die uitmergeling
die ootmoed
die verleentheid
die spyt
die weemoed
die verlange

vlak op
die buitenste ruim
van die vel
bly
die
son
skyn


sy regopstaan
in stukke
opgekap


mannekyn

waaragtig nie ‘n harlekyn of vrouekyn
maar inder-woord
‘n mannekyn!

wil die man-heid 
selfs op bloed-en-koplose pop
sy stempel plak!? 


uit gritserigheid
word die
vertederende
vreedsaamheid
van slaap 
gegiet

***
fotos geneem op die Goodwin plaas, Lidgetton, Midlands van KwaZulu-Natal

Tuesday, 24 August 2021

die lag

buite die grense van my kop
verby die bastion van my skedel
ander kant die filter van my vel
is 'n sosio-medies-politiese wêreld   
met so baie verbeeldingsryke kaalgatkonings
so veel blinde aasvoël-en-heyna aanhangers
en altyd die waarheidsoekende harlekyne
wat meer sukses het as die yogis
om lug in mense se longe te kry
dit is nie geld wat die wêreld tans red nie
dit is die lag

Sunday, 9 May 2021

kom ons praat oor die weer

intelligente mense sê dit is nie smaakvol 
om oor die weer te gesels
maar ek dink dit is bitter opwindend
wat is lekkerder as om te beskryf
hoe sterk en van watter hoek die winde oor my nek waai?
wat nog te sê van die heerlike skyn van 
die son na dae aaneen van reën?
ons velle raak mos opgekikker en 
wakker getoor deur die vingers van die weer
hoe lawend hoe salwend wanneer die reën oor die droë aarde val
en wat van daai wolke wat bly vorm verander en 
my oë toor met draak-, gesig- en seeperdjie-beelde 
wie wil tellie of selfoon kyk as jy op jou rug kan lê en staar na die wolke?!

wie't nou weer gesê moenie oor die weer gesels nie?
ek gaan nie net oor die weer praat nie
ek gaan daaroor sing!
EN niemand gaan die onderwerp verander nie!

Saturday, 16 May 2020

die grassnyer bly dwars

die grassnyer bly dwars en 
dans klippig en pittig
deur die bowling alleys 
van die gewete