Showing posts with label musiek. Show all posts
Showing posts with label musiek. Show all posts

Saturday, 26 August 2023

nader

elke keer wat ek 'n klavierstuk bemeester
voel dit asof ek 'n tree of twee
nader aan die uitmergeling beweeg

my rug, my ribbes, my longe, my skouers,
my nek, my heupe, my boude
word stukke wrak van die inspanning

ek strek, ek stap, ek yoga, ek fiets, ek dans,
maar dit voel nie genoeg
moet ek die klavier laat gaan vir 'n wyle?

wat begeer ek meer - 
'n gelukkige en vry lyf
in die uitspansel van die natuur
of vingers en rug styfgekorrel in harmonieuse vlug
oor die een en 'n halwe meter klaviatuur? 

Wednesday, 16 August 2023

verder

elke keer wat ek 'n klavierstuk bemeester
voel dit asof ek 'n tree of twee 
verder van die dood beweeg

Wednesday, 18 January 2023

klawer-aarde

        vir my Feetjie-Fiona

die eerste dag toe ek my eie kar besit
op die ouderdom van 37
het ek my silwer rok aangetrek
en agter die stuur ingeklim
vir ‘n spin en fotos
6 jaar later trek ek weer my silwer rok aan
dié keer klim ek agter my nuwe Yamaha klavier in
vir die eerste keer ‘n klavier wat ek waarlik myne kan noem
en ek vat haar vir ‘n spin
ek drapeer my Feetjie se feetjie-liggies oraloor
om haar gulhartige en vrygewige gees hier
oor my te voel dartel
en my hart en vingers staan tuit

ek het nooit grond besit
maar vandag met my vingers al hangend oor die klaviatuur
voel ek hoe dit is om ‘n stukkie aarde myne te kan noem
‘n stukkie swart en wit klank-grond
waarmee ek die dieptes en hoogtes op en af kan klim

ah so iets glinsterend wat ek myne kan noem
dit is soos ‘n droom!

hoe baie klaviere het al onder my hande gegaan
onder my palms gesing
gebrand gevloei gevlieg
maar dan moet ek gou koebaai sê
want hulle was nooit myne nie

maar hier staan my eie klavier nou haar stewige staan in my see-huisie
is dit hoe dit voel om ‘n stukkie aarde te besit?
‘n stukkie woud?
‘n stukkie wind?
‘n stukkie oseaan?
‘n stukkie oase?

ek sien uit na die trillende horisonne wat deur die snare gaan oopbreek
die getye van melodieë wat die mure gaan afbreek
en die sterrehemel van die harmonieë
wat in my hart gaan inbreek
ek sien menigte klein oerknalle wat die punte van my vingers gaan lostoor!

maar vir nou,
buig ek neer voor hierdie klawer-aarde
en ek sê dankie
dankie

dankie

Monday, 13 June 2022

seekat

i

soos ek klavier speel verander my vingers in
die pote van ‘n seekat
my vel flits kwiksilwerend in kleure wat
flambojant vlamme oor die klawers verf

ii

en skielik word my hart die pylende lyf van
die seekat wat oor jou vel
dartel en suier
suier
suier
die einste kleure en teksture van jou vel en
wese aanneem
ah as my hart jou seekat kon wees
sag en suierig in my liefde op jou sit
saamsmelt in jou lewensvorm
en niks of niemand my daar sal afpluk
en onder die vergrootglas van die wysneuse
oopspalk nie

Thursday, 9 June 2022

ek wil

ek wil 'n gedig skryf wat soos 'n harts-
verrukkende akkoordprogressie
deur my siel sal breek

Wednesday, 20 October 2021

net een asem oor

die strewe dat 
my asem
my musiek 
my drome 
my soene
my spronge
my aanraking
my digkuns 
my danse
my gille 
my liefde
my gesprekke
in een helse molto legato lyn uit my liggaam peul
en alle lirisisme oortref

soos 'n sanger met nog so baie melodieë 
wat wagstaan in the wings

maar net een asem oor het

Wednesday, 29 September 2021

jy vra wat is my geloof

my geloof is my dissipline wat 
my sielkunde my talent
my lyf my kop 
ondersteun versterk en onderhou

my geloof is my lyf
my tong
my slaap
my vingers
my dans
my musiek
die wêreld se musiek
my digkuns
die wêreld se digkuns

my geloof is my oë
my estetika
my ritme
my kindness
ander se kindness
my lus
my lewenslus
my energie
my vonk
my nuuskierigheid
my ervaring
my herinneringe
my onskuld

my geloof is die natuur en die elemente wat
my lyf bly aantrek om lewendig
en uitbundig te oorleef

Saturday, 25 September 2021

daar is jou asem

      vir Kim

ek voel jou asem dartel
uit die gleuwe tussen my klavier se 
swart en wit klawers
soos vlerke fladder jou asem
tussendeur my vingers
selfs deur die stadigste melodie
daar is jou asem
gereed om nes te maak in
die oopgestrekte webbe van my vingers

ek buig af totdat my neus amper
die klawers raak
ek laat jou koel asem
my op my lippe kielie
ek rus my kop teen die klavier se deksel
ek glimlag groot
want ek het nou net jou 
hele asem deur my mond ingesuig
nou is ek reg om Granados te speel

***

Kim's answer:

I will change my peachy colour
To black and white
Mould my rounded form
To hard rectangular keys
Turn my gut into a wooden chamber
My bones and sinews
Will become a metal frame and fine steel strings…
And when your fingers play me
Rhythm of my heart
Resounding in my mind,
I believe I will know your very soul
And for a time
We will be one.

Wednesday, 30 June 2021

vanaand

        Konsert op die Shigeru Kawai vleuel klavier,
        Tatham Art Gallery
        Pietermaritzburg

vanaand kom ons staan saam
binne die oseaniese uitspansel
van hierdie grootse instrument

kom ons gooi ons kwesbaarheid
ons vreugdes, ons vrese
ons drome, ons honger
in haar golwe

haar getye giet 
die frekwensies in heilige harmonieë
stralend uit vingers -
sagte skadu's ululeer 
oor die klaviatuur

Monday, 12 April 2021

ek wil diep in my eie hande sit

ek wil diep in my eie hande sit
en daar inkrul saam met die harmonieë 
en druppende ritmes
wat soos reën en herfsblare 
al om my smeltende ribbekas val

Wednesday, 26 February 2020

klank-spiere

in die kaskades van akkoorde wat val in die diep poele
van tyd
hoor ek die geeste gly deur die vingers se verbeelding
die klank-spiere skarnier met bedrewenheid
deur die oortonnels
die ontspanning en spanning in elke klank
kalibreer elke keer 'n nuwe hoopvolheid
dit is son vir die sintuie
wat deur elke porie insyfer
en die hart toor tot 'n bronsrooigoue klok
wat uit nuwe hartkamers tril en beier

en nogsteeds bly die kern van klank 
so glibberig 
dit gly gedurig uit ons tastende hande
ons soek beheer
ons soek tyd
dit is die musiek waarmee ons buite tyd kan klim
en dit is met musiek wat ons nuwe tyd kan maak
dit is ons verslawing
ag as die musiek maar heeltyd deur my siel kan filtreer
en my gemoed stroop en suiwer

ah musiek! wees genadig wees goedhartig wees geil
sonder jou stotter ek aan die sillabes van die lewe
met jou in my ore is niks vergesog
jy groei oor my hart soos mos oor klippe
maak die genadelose hoekigheid 
binne my
so sag en plooibaar
soos jou klank-spiere

Tuesday, 22 October 2019

kwiksilwer asems

            vir Kaolin

waaragtig die kreun in
ons ribbes hou nie op nie
die selle weier om te ontrafel
ons speel die vrees weg
ons klou verbete aan ons kele in die duister tye
bang en bly dat ons siele sal ontsnap na
beter sinsasies
o hoe ons hou daarvan om
te speel met die klanke gedoop in
primordiale herinneringe

diep in ons oorkanale bloei daar vlerke
wat nie kan wag om te vlieg
die rugstring loop hier reg uit ons kele uit
en spat in kwiksilwer asems deur die silwer pype
die vlees volg die klank
ongeag van skaamte
sal die vlees luister en onverskrokke
ons kwesbare siele bly omhul

ons polsslag verteer elke dag tot ‘n vlugtige gedig
ons ledemate bly hardloop agterna
die hande wil gryp gryp na vashouplek

die tornados in ons heilspellende inkantasies
sal bly kolk solank die kwiksilwer asems
in aanraking bly met die oer-grond

al wat ons wil hê is dat ons klanke
resonerende spore sal agterlaat
versadiging dartel soos warm silwer
deur ons klei-lywe

mag die kwiksilwer asems
ons kele
smelt en
giet tot 
in
vermurwende vrede

Monday, 24 June 2019

vrypostig

ek moet blindelings oor die papier dans 
met oë toe en hart oop
laat die sillabes musiek in my ore oopbreek

die intervalle klim my woorde soos trappe
die verlangende mineur sesde en 
die hygende chromatika van die mineur tweede

oor die toontrappe gly ek 
met dronke voete op en af
en vind my sinne hulle eie melodie

ek weier dat enige argitketonika 
met reëlmaat of simmetrie
die rym in my kop pons!

kyk net hoe my hande en 
heupe en hare 
en vel so vrypostig oor die papier dans

die metafore peul bont uit die oksels van my arms
geen enkele woord sal in my taal 
ongesê gelaat word nie!

Tuesday, 19 September 2017

Koor-repetisie in Kwandengezi

ek en Sandile Mabaso - tenoor en koordirigent -
sit in ‘n taxi oppad na Kwandengezi
duskant Pinetown in KwaZulu-Natal
net voor ons vertrek klim twee dronk mans in
met die uurlange reis is ons getuies van
hulle onophoudelike  argument oor
wie die R10 taxi-fooi gaan betaal
die humor van die situasie smelt in
ons stil mondhoeke

hier sit ons - twee klassieke musici in
die geroesemoes van ‘n taxi
onderweg na ons repetisie
ons hardloop ‘n bietjie laat
Sandile stuur whatsapp boodskappe om
te laat weet ons is oppad
die Vusisizwe Choral Society in Kwandengezi
wag geduldig vir ons aankoms

ek is ietwat senuweeagtig
die Donizetti en Mozart wat ek ingeoefen het
is vinnig en daar is baie note

toe ons arriveer groet die koorlede ons met
soveel dekorum en dankbaarheid
ek het my kort pers rokkie aan
ek vermoed die koor het nie verwag dat
‘n vrou met sulke dun beentjies so kan klavier speel nie
moet ek byvoeg daar was nie ‘n klavier nie
wel ‘n keyboard sonder ‘n pedaal en staander
al is my konsentrasie intens
kry ek so lekker om te hoor hoe
die sterk stemme teen die mure bons

more het ons ‘n optrede in Pinetown se Metodiste kerk
en Sondag in die Tatham Kunsgallery in Pietermaritzburg
die opwinding sit hoog in almal se kele

die koor het geld ingesamel sodat ek
die volgende twee aande in
die Pinetown Bay Lodge kan oorslaap
‘n saligheid lê oor my toe ek
die aand in die bed klim
as ons maar net weet hoe gelukkig ons is
om in Afrika musiek te kan maak!

Tuesday, 6 September 2016

spark / vonk

for clarinetist, Morné van Heerden

and in the beginning was the spark
and the spark became breath
and breath became sound
and sound became throat
and throat became pipe
and pipe became finger
and finger became man
and man became dance
and dance became man
and man became finger
and finger became pipe
and pipe became throat
and throat became sound
and sound became breath
and breath became spark

aan die begin was die vonk
en die vonk het asem geword
en die asem word klank
en die klank word keel
en die keel word pyp
en die die pyp word vinger
en die vinger word mens
en die mens word dans
en die dans word mens
en die mens word vinger
en die vinger word pyp
en die pyp word keel
en die keel word klank
en die klank word asem 
en die asem word vonk

Monday, 17 August 2015

maar net mens

ek huppel vlugvoetig oor die klippe
met die ou tannies se sing-alongs
helder ingekleur
in my gemoed

hoe de donner moet die groen onder my
eie voete groei as ek die heeltyd om een plek staan?
die gras sal mos verdor!

al gedra ek myself hoe,
dis altyd so moeilik om my wispelturigheid
hok te slaan

ek verpes verleentheid
en donder, hoekom sit geleentheid
so na aan verleentheid?!

ek hou van die grond onder my voete
dis kaalvoet wat my leer om die weerstand te laat vaar
en net te staan
voete klou vanself

moenie my opinie deesdae vra
want ek forseer so dikwels om nie saam te stem nie
drapeer die winde van weerstand om my
my vel sal wild wapper
en die duiwels op my skouer sal grinnik

onmiddelike lewegewendheid sit 
hier in my asem
hoekom nie mildelik asem skep
duisend keer per dag
ek sal 'n paar muggies insluk
maar meer suurstof in die longe
sal verseker 'n magtige sin-dikaat
van helder gedigte skep
ek sal die spel van die lewe ook beter speel

ek hou van krismis-tyd – die neute skyn
meer goud en brons as gewoonlik
die strikke maak my tone krul van krismis-plesier
en die allerlei koekies gepak in hulle blink blikke
bulder skaamteloos die vretende tering van
die verorberende verbruikers

deur die kunsliedere wat deur
my vingers sypel
word my verwarring gesus
en kan ek weer helder dink

Thursday, 25 June 2015

jou hart vergroot

met slegs ‘n handvol klank-golwe kry Beethoven
dit reg om groot energie en edelmoed
soos die sterbelaaide heelal
voor ons voete te gooi
jou hart vergroot
geen woord kan hierdie gevoel waarlik vasvang
met die aanhoor van hierdie musiek
word alles wat onmoontlik was
skielik moontlik
in die drama van die resonante frases
word die grootsheid van god, natuur en mens saamgeweef
die hart is op een slag vervuld en smagtend
hierdie musiek kan nie help om ons ewige hunkering na
dit wat hoër en groter as ons is
bloot te lê

your heart expands

with only a handful of sound-waves Beethoven succeeds
to throw great energy and nobility
like the star-laden universe
in front of our feet
your heart expands
no word can truly capture this feeling
with the hearing of this music
everything that was impossible
is suddenly possible
in the drama of the resonant phrases
the greatness of god, nature and man weaves together
the heart is at once fulfilled and desirous
this music can not help but to expose
our unquenchable hankering after
that which is higher and greater than ourselves

Sunday, 21 June 2015

mag die musiek soos sterre

 mag die musiek soos sterre
en edelgesteentes
in ons are oopbreek
sodat millennia se strewes en visioene
wonderwerke
in ons murg openbaar

may the music break open like stars

may the music break open
in our veins like stars
and gemstones
so that millennia of strivings and visions
unfold miracles
in our marrow

Thursday, 11 June 2015

rivier en son

soos rivierstrome moeiteloos
oor klip stroom
stroom die frases van musiek deur
die ravyne van tyd
kalwe dit my siel uit in
diep holtes waarin
die melodieë soos helder waterpoele blink

as die musiek nie speel nie
is dit soos droogte
en kan die dorre rivierbeddings nie meer wag
vir die feesvierende frases
om uit die wolke te breek
en die honger holtes van ons ore
te verkwik met salwende harmonieë nie

suiwer suiwer suiwer mag ons siele bly
in die versuiwerende klank van musiek
die klank kolk oor my
en soos ‘n bedrewe toornaar
trek hy my siel van binne na buite
en voel ek hoe die musiek soos die son
seëninge oor my lyf uitspreek

Monday, 25 May 2015

houvas

in die middel van die aand
pluk die herinnering van ‘n melodie
my uit my slaap
vul die donker met klank

vlugtig verf 
die harmonieë
die siel 
vol kleure

musiek word 
deur baie hande gemaak
maar geen waarlike houvas 
het ons ooit