Showing posts with label tegnologie. Show all posts
Showing posts with label tegnologie. Show all posts

Saturday, 27 January 2024

ek kies

ek opt nie vir laptop- of foonskerm vanaand
ek kies die reghoekige oppervlak van my skryfboek
geen glurende lig wat my psige en aandag  
in duisend stukke opkerf nie
geen kranksinnige duim
wat breindood tot in die doldrums van bestaan
a
f
s
c
r
o
l
l
nie
geen stywe voorkopfrons 
wat vol inspanning probeer kophou
met al die senutergende stimuli en
    uitspattighede 
  en klaekouse    
          en afshowers

dit is net ek en my potlood
en my 192 bladsy A5 skryfboek
waar dagdroom, planne-beraam,
verbeelding, dankbaarheid,
openhartigheid
en
saligheid uitkrul

nuwe gewoonte vir 2024:
gryp nie die skerm - 
gryp die magtige 
POTLOOD!

Friday, 8 September 2023

kou en spoeg

sluk die slimfoon in met een groot oopbekgedig
die skerm, die tikbord, die knoppies, die ports
- die hele keboodle -
kry die foon terug vir al die kere wat hy jou
so onsjarmant en ongevraagd ingesluk het

nee! beter as sluk -
kou die fokkin foon - screen protector en al in fyn stukkies
en spoeg in die donkerste gat van wegboendering

Tuesday, 5 September 2023

bly soewerein oor die blikbrein

die lig breek van diep binne my sintuie
geen rekenaar of robot
skrik my af nie!
die lewe voel sommer skerper
en snaakser met
die wete dat ons bestaan deur blikbreine uitgedaag word

ek het 'n sterk wilsbesluit gemaak dat 
ek nie geintimideer sal word deur
die AI se geprogrammeerde talente nie
en dat ek vuriger en met sekuurder fokus
my kreatiewe spiere sal inspan
ek weier om my mag en onafhankliheid prys te gee

as dit sover gaan, sal ek hierdie wedren met 
bultende, swetende en bloeiende spiere hardloop

Monday, 4 September 2023

moenie verlei word

hoe kan jy jou vertroue in 

chatgpt sit vir kreatiewe antwoorde?! 

hy weet en sif en vergelyk

en klink wonderbaarlik slim agter 

al daai regurgitasie

maar wat voel hy?!

hoe ken hy werklik die gevoel van

pyn 

ongemak 

vergeetagtigheid

vrees 

frustrasie

verlange

ongeduld

gretigheid

tydsbeperking

angstigheid

senuweeagtigheid 

oudword 

mortaliteit

alles gevoelens wat vroedvroue is vir kunswerke 


ons moet ons onhandigheid

ons onvermoë

ons honger vir vervulling

ons ongedurigheid

ons spelfoute

ons digterlike lompheid

ons onhelderheid

ons dubbelsinnigheid

ons weersprekendheid

ons deurmekaarheid

ons duiseligheid

ons oorweldiging

ons dull and uninformed moments

ons twyfeling

ons onvertroue in onsself

helder en onbeskaamd in ons warmvellige menslikheid uitbasuin


moenie verlei word deur die siel-en sintuiglose chatgpt nie

sit sommer jou spellcheck af

deactivate text prediction

uninstall alle sosiale apps

stuur google in sy moer

fok al die influencers

dit is nou die tyd om na jou eie stem te luister

zoom in op jou eie insigte en hartkamers

dit is nou die tyd om jou warmsellige brein ten volle te omhels

 en jou onweerstaanbare wilsmoedigheid

wild en wyd oor die aardbol te laat wortelskiet


Sunday, 13 August 2023

verwronge gesig

shit, word ek ingekatrol
deur die facebook gat
wanneer ek aan die ander kant uitstrompel
voel my gesig soos die portrette van Picasso
oë, neuse, monde, wenkbroue, ore 
op ander plekke oorgeklim

ek vat my twee hande
en druk en knie
my gesig se vel en bene en 
oog -en neus -en mondholtes
terug na hulle gewone plekke

na ek ingesluk is deur die selfoonskerm
kom ek stotterend terug na die oppervlak
o fok, my gesig het weer uitmekaar geval
in plaas van myself regruk
frommel ek my verwaarloosde gesig op
en gooi dit tussen die kannibalistiese tande van die kuberruimte

6 junie 2023

Tuesday, 14 September 2021

maar die honger bly

ons sit almal vasgenael aan
ons fone
bukkend-desperaat opsoek na
die antwoord

honger vir heling 
vir samestemming
'n bevestiging
'n vonk
'n deurbraak
wêreldvrede
hongersnoodverligting

maar die honger bly
honger

honger

    honger

Wednesday, 20 January 2021

weet nog hoe rond voel en rond lyk

die alewige inhokking
van die vierkantigheid
van die selfoonskerm!

ek is dankbaar ek droom nie in vierkante en square skerms nie!
as ek op my rug gaan lê reg vir slaap
tol en rol ek my oë ronder as rond in my oogkaste
ek maak seker my oogspiere weet nog hoe rond voel en rond lyk

die alewige vasnaeling aan die hoekige skerms
pasop vir visuele amputasie!

bly smag na die ronde kurwes en deinings
bly glo in die golwe en swierige driedimensionaliteit
hou aan om myself te verkyk aan die
oorvloeiende horisonne van my eie vormryke sig
dit is al hoe my oë volrondig en lewend sal bly!

Friday, 11 October 2019

die stompste wapen

met die afscroll raak die skerm 'n magneet 
haar hand, frons en skouers
'n stywe lyn ineen gevleg

sy verloor haar speelse 
bewegings
en buigbare denke 
haar mensheid verkrummel

die serebrospinale vloeistof
stol in hulle tonnels
en haar veerkragtige huppel    knak

die wit in haar oë vertroebel
die irisse reflekteer
die dodelike skerm wesenloos terug

haar sintuie word geamputeer

deur die stompste wapen
van alle tye - 

die selfoonskerm


Sunday, 4 June 2017

fonolisasie

jirre dit vat fokkin dissipline
om nie die foon tot in
my slaap vas te klem nie

kolonisasie is nou
iets van die verlede
make way for phonolisation!

god, red ons van hierdie uitsuiging en uitbuiting!
die kolonie van die foon neem oor
tentakel teen een rampspoedige spoed ons koppe

wat makeer ons dat ons so ‘n noodsaak het
om vasgegom aan hierdie siellose
platvlakkige vierkantigheid te wees?

vandag ag ons
ons onafhanklikheid
en vryheid so hoog

maar sonder wapen, woord of geweld
ruim die skynbaar skadelose skermpie van die foon
enige outonomie eensklaps uit die weg

Sunday, 22 May 2016

in plaas van my foon

in vandag se smartphone-era
haal ek trots in
die oog van die publiek
my potlood en skryfboek uit in
plaas van my foon

met oordrewe arm-swaai
vou ek die blaaie oop en
met ekstra perkussiwiteit speel ek
met my potlood op die blad

maak ek seker die teenwoordigheid van hierdie skryfboek en potlood 
word helder en onbeskaamd
in die bewussyn van 
die oorbevolkte selfoon-landskap
aangekondig

Tuesday, 27 October 2015

kunsmatigheid

ek sit in die kar
en elke stukkie materie wat my omring
breek in duisende atomiese partikels in     my      kop           oop

glas
hout
plastiek
rubber
papier
lap
wol
metaal

los op voor my oë
en ek is

skielik

in ‘n wêreld waar daar
niks
mens-gemaak-geweef-gesmelt is nie

ons word gebore in soveel kunsmatigheid
al is dit alles hoe
beskaafd
behaaglik
en
beskermend
kan ek myself nie keer om te verbeel
hoe dit sal wees om
sonder
enige van hierdie
lae
mure
deure
skilde
en
pantsering
te leef

hoe sou ons sintuiglikheid
dan reageer en ontwikkel het?

Friday, 11 September 2015

skermpie-lewe

almal voor hulle skermpies
flikker al die apps,
nuus, fotos, updates en
verwoede lyne in die eter
wat ten alle koste
gekonnekteer MOET bly

wat de hel soek ek op die kruin van die berg
in die vryste oopste lug
as ek die hele wêreld in
my handpalm kan hou?!

NEEEEEEEEEEEEE!
dit is net skermpies, duime
tone senuweeagtig tikkend op die vloer
strak en siellose frons in die oë
wat kan meer verdoemend wees
as hierdie skermpie-lewe?!

Sunday, 17 May 2015

selfie

die herontginning van die Self
die oppervlakkige EK-splorasie 
vanwaar hierdie wil om van die Self
‘n fotografiese portret te maak?
die vasvang van die held van jou eie storie
die begeerte om jou eie celebrity te wees
die dokumentering, websiting, 
blogging, tweeting,
facebooking en instagramming
van die Self en vir die Self
die vreemde 21ste eeuse tendens om die Self
op die baksteenlose mure van kuberruimte te ontbloot

vir wat wil ons in 'n koue photo-booth gaan sit 
om deur 'n masjien afgeneem te word?
dit is so passé om deur burokratiese oë
vasgevang te word en op Groot-Broer se lens
opgeoffer te word met vaal en glimlaglose gesigte
ons sal nou die kamera-knoppie self druk om 
ons eie geoefende glimlagte af te neem, dankie!
hoeveel ekstra sentimeters ons nekke en arms ookal moet groei
weier ons om iemand te vra om dit vir ons te doen
ons sal dit SELF doen, ons dring aan 

welkom aan die Selfie: waar die Self in beheer is van die Self
- ons glo en hoop so -
ons wil heersers van ons eie lot wees
ontwerpers van ons eie paaie
publiseerders van ons eie gesigte
ons weier om automatons te wees in
die siellose meganiek van bestaan
ons sal skyn
ons sal beautiful wees
ons het nie catwalk-monde nodig om
vir ons te pose en pout nie
ons sal ons eie smiles smile
en ons eie rigting inslaan
die tyd dat ons wag vir iemand of iets om
ons lot te choreografeer is verby
dit is nou die tyd dat ons ons eie lewe bemagtig
en dit begin met die Selfie