Groot Gees

sit al die ligte af

brand mpepho en salie

roep die geeste van die Woord op

onttrek myself van enige drink of eet

ek uiter geen woord

is stil en oop vir

die manifestasie van

‘n rustige ongretigheid

vanself begin my lyf draai in ‘n kolk om en om

word ek dronk op die suiwerende oomblik van

die letterlike loutering

trek die walms van die brandende kruie

diep in my longe

sien hoe die woordgeeste

vorm begin aanneem in

hierdie rare aardse verskyning

die rillings breek uit oor my hele lyf 

o die oomblik kom nader

die arrivering van die Groot Gees van die Digkuns

het aangebreek

sy asem hang soos dik stoom in die vertrek

ek ruik sy woorde in die diep donkerte van die stilte

die letters drup soos warm kerswas op my hoof

moenie probeer om dit af te vee

laat dit drup drup drup in my skoot en

kwiksilwerig uitdartel op die ouija bord

ah ah aaaaah

dis onmoontlik om weg te kyk

die hipnotika is sterk in hierdie oomblik

in die mees heilsame asemrowing

hoor ek hoe die lettergrepe in die mond van

die Groot Gees die

mees magiese gedig uitspel ...