kolkende kelke

die lyf blom 

in kolkende kelke

waaruit die kuite

regdeur

die son staar

soos 'n steenbokkie

in die afwagting op jou vele komste na my woonstel
trippel ek soos 'n steenbokkie oor die velde van my opwinding
ek bly spring na die venster en loer verwild na die straat
ek is ongeduldig, bevlinder, mallerig, bewerig
skud my hare alewig reg 

knik my kop en warm my glimlag en 

smeulende kyk op in die spieël
hoeveel keer voel ek gelyktydig mooi en lelik
sal ek ooit bedaar?
ek wil net so perfek en aantreklik vir jou wees

(o lewe so rojaal en so wreed is jy!)

die gedigte stoot vermallend om en om in my kop

soos die stuwende getye van die oseaan 

teen elke stukkie hygende lewe beur en

skommel my om en om

soos die helder heliksing van die singende DNA

jy vries my dansende lyf in honderde stop-motion tonele

ek is nie bang dat jy my in elke oogknip en uitreik alles laat voel nie:

samehorige verlorenheid

vlietende ewigheid

laggende weenklae

fragmenterende behoort

ontbindende voleindiging

troebel helderheid

en smee-ende verwonding

die cantabile-lyn wat jou siel uit jou keelwand trek

versplinter in honderdduisend lewendige sterftes

die murg resoneer daagliks met die uitgehongerde versadiging

en ons koppe hang oor die helderwarrelende naarheid

van elke sterwende herlewing

(o lewe so rojaal en so wreed is jy!) 

jou vingerafdrukke ets obsidiaan my siel

terwyl die fluweelkyk in jou oë

stralekranse uit elk van my porieë laat skyn

iets bly groei

ahhh, my hart,
ons nou net afgelui op die foon
ek kon jou glimlag hoor straal deur jou stem
so warm sê jy my naam 

sien jou nounou Lara

'n sagtheid, 'n deernis

'n warm verbinding deur my ore direk na my hart

gee my oombliklik soveel vertroue 

in hierdie liefde en omgee tussen ons

iets bly groei 

droom dromer droomste is jy

geniaal meesterlik verleidelik

die perfekte minnaar

op my aardbol

is jy

jou retoriese-erotiese vraag:

het jy genoeg gehad

maak my rasendwild 

hoe jy dit regkry om my verder en verder 

oor die trillende horison te stuur

jy verhelder my

ek het vir jou gesê jy is geniaal

en ek staan nogsteeds daarby

dit vat 'n genie, 'n sekere meester, toornaar, 

siener, sanger, 

minnaar, man, 

mens, JY

om hierdie klein druppel van 'n mens, vrou, 

digter, tokkelaar, huppelaar, 

lewe-liefhebber, EK

so helder raakgesien en raakgevat te laat voel

dit vat 'n genie om iemand soos my raak te toor

soos wat jy dit doen

ek is vermal ek is verlief ek is versot

ek is verhelder soos nooit vantevore

sonder oë

die ekstase

  is gestempel
    soos versengende braille
       oor my hele lyf
          sodat jy 

             sonder oë
                 kan lees 

                     hoe verruklik 

                         verlief
                             ek

                                op  

                                   jou 

                                      is

daar is geen woorde

die oggend na die ekstase

breek die huil die gil die kreun los

die verwondering oor so iets intiem

so gehuld so geberg

hoe kan so baie lig so baie vreugde

in my enkele lyf moet vassit

ek wil dit in jou ore skree

hierdie potlood en lettergrepe beperk my

ek wil die mure afbreek

met hierdie nuut-ontdekte plesier

jy verheug, verjeug al my selle

ek sal skryf totdat iets van hierdie ekstase 

verbottel 

ver-dig kan word

die herlewing wat jy in my oopgetoor het

is so stralend magies

daar is geen woorde vir wat jy aan my doen

argeoloog

argeoloog is jy
jy diep skatte op uit my binnenste ruim
en laat dit oop- en 

uitstraal soos verskietende sterre

oor die ganse hemelruim

jou aandag is verbysterend

jou aandag is verbysterend,

bo-manlik, bo-menslik

hoe kan een vrou so baie aandag geniet?

jy onthul die geheime in my lendene

ek wil die vreugde, die verrukking,

die oorgawe, die feesviering

die bemagtiging, die erotiese fonteine met die res van die uitgehongerdes deel

- vrou en man -

die dorstiges, die gefrustreerdes

die hartgebrokenes

die vergetenes, die afgeskeeptes,

die moed-verloorders

en selfs hulle wat dink hulle

ken versadiging en verrukking

in elk sal 'n reinkarnasie oopblom

van die loutere ekstase

wat jy met jou enkele veelvuldige toorlyf ontketen

eerste gedig vir jou

my oogwimpers wil

jou sternum ontsetel

my wangbene wil 

jou heupbene ontsluit

my vingerpunte wil 

lofliedere oor jou onweerstaanbare glimlag openbaar

my tong wil 

die chiaruscuro in jou siel oplek

my verhemelte slaan uit in hoendervleis

soos jou stembande deur my murg vibreer

my ondeunde tande wil 

jou kniekoppe soet en sappig verbrysel

my soele lang inasem wil 

jou hele rugstring insuig

my basuinende uitasem wil 

al ons ordentlikheid skaamtes versigtigheid en makheid

uit hierdie wentelbaan verwilder

my elmboë wil 

in jou dye insmelt

my nek wil 

diep binne jou murg nesskop

my kop wil 

verdrink in jou ribbekas

my hart sit ek teen jou ore

sodat jy wild en wakker die koorsagtige klop kan hoor

my borste druk in braille

die hartstog teen jou ruggraat in

my hande wil 

die blom van jou lyf oopspiraal

7 sept 2024